---
title: "#policeofficerdeath | കുറ്റ്യാടിയിൽ മരിച്ച നിലയിൽ കണ്ടെത്തിയ പോലീസുകാരന്റെ മൃതദേഹം വീട്ടുവളപ്പിൽ സംസ്കരിച്ചു "
english_title: "#body #policeman #who #found #dead #kuttiadi #cremated #his #house"
publisher: "kuttiadinews.in"
canonical_url: "https://kuttiadi.truevisionnews.com/news/156513/body-policeman-who-found-dead-kuttiadi-cremated-his-house"
published_at: "2023-10-24T15:27:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6537959a85049_policedeath.jpg"
keywords: []
---

# #policeofficerdeath | കുറ്റ്യാടിയിൽ മരിച്ച നിലയിൽ കണ്ടെത്തിയ പോലീസുകാരന്റെ മൃതദേഹം വീട്ടുവളപ്പിൽ സംസ്കരിച്ചു 

> **Lead Summary:** **കുറ്റ്യാടി : ** കുറ്റ്യാടിയിൽ മരിച്ചനിലയിൽ കണ്ടെത്തിയ പോലീസുകാരന്റെ മൃതദേഹം വീട്ടുവളപ്പിൽ സംസ്കരിച്ചു. കോഴിക്കോട് മെഡിക്കൽ കോളേജിൽ പോസ്റ്റുമാർട്ടം നടത്തിയ ശേഷം മൃതദേഹം ബന്ധുക്കൾക്ക് വിട്ടു കൊടുത്തിരുന്നു.ഗാർഡ് ഓഫ് ഓണർ നൽകിയാണ് മൃതദേഹം സംസ്കരിച്ചത്. അതേസമയം, പൊലീസുകാരൻ സുധീഷിന്റെ ആത്മഹത്യയിൽ ദുരൂഹത ആരോപിച്ച് ബന്ധുക്കൾ രംഗത്തെത്തി.

## Article Content

**കുറ്റ്യാടി : ** കുറ്റ്യാടിയിൽ മരിച്ചനിലയിൽ കണ്ടെത്തിയ പോലീസുകാരന്റെ മൃതദേഹം വീട്ടുവളപ്പിൽ സംസ്കരിച്ചു. കോഴിക്കോട് മെഡിക്കൽ കോളേജിൽ പോസ്റ്റുമാർട്ടം നടത്തിയ ശേഷം മൃതദേഹം ബന്ധുക്കൾക്ക് വിട്ടു കൊടുത്തിരുന്നു.ഗാർഡ് ഓഫ് ഓണർ നൽകിയാണ് മൃതദേഹം സംസ്കരിച്ചത്. അതേസമയം, പൊലീസുകാരൻ സുധീഷിന്റെ ആത്മഹത്യയിൽ ദുരൂഹത ആരോപിച്ച് ബന്ധുക്കൾ രംഗത്തെത്തി.

ജോലി സമ്മർദ്ദമാണ് ആത്മഹത്യക്ക് കാരണമെന്ന് ബന്ധുക്കൾ ആരോപിച്ചു. മരിച്ച സുധീഷിന്റെ മൊബൈൽ ഫോൺ കാണാനില്ലെന്നും കുടുംബം പറയുന്നു.

സിനീയർ സിവിൽ പൊലീസ് ഓഫിസർ എം.പി. സുധീഷിനെയാണ് ഇന്നലെ വൈകുന്നേരം മരിച്ച നിലയിൽ കണ്ടെത്തിയത്. ഇന്നലെ രാവിലെ പതിനൊന്ന് മണിക്കാണ് സുധീഷിനെ ഡ്യൂട്ടിക്കിടെ കാണാതായത്.

പിന്നീട് നടത്തിയ തിരച്ചിലിനൊടുവിലാണ് പാർക്കിം​ഗ് ഏരിയായിൽ സുധീഷിനെ തൂങ്ങി മരിച്ച നിലയിൽ കണ്ടെത്തിയത്. ഇന്നലെ രാത്രി മൃതദേഹം ഇൻക്വസ്റ്റ് നടപടികൾക്കായി മൃതദേഹം സംഭവ സ്ഥലത്ത് നിന്ന് മാറ്റുന്നത് നാട്ടുകാർ തടഞ്ഞിരുന്നു.

ഉന്നത പൊലീസ് ഉദ്യോഗസ്ഥർ സ്ഥലത്തെത്തണമെന്ന് ആവശ്യപ്പെട്ടാണ് നാട്ടുകാർ തടഞ്ഞത്. രാത്രിയിൽ ഇൻക്വസ്റ്റ് നടത്തിയതിന് പിന്നിൽ ദുരൂഹതയുണ്ടെന്നും നാട്ടുകാർ ആരോപിച്ചിരുന്നു.

മൃതദേഹം കോഴിക്കോട് മെഡിക്കൽ കോളേജിലേക്കാണ് മാറ്റാനായിരുന്നു ശ്രമം. എന്നാൽ നൂറോളം വരുന്ന നാട്ടുകാരും കോൺഗ്രസ് പ്രവർത്തകരും ചേർന്നിത് തടഞ്ഞു.

ചർച്ചയ്ക്ക് ശേഷമാണ് ഇന്നലെ മൃതദേഹം വിട്ടുനൽകിയത്. അതിനിടെയാണ് മരണത്തിൽ ദുരൂഹത ആരോപിച്ച് കുടുംബവും രം​ഗത്തെത്തുന്നത്.

സുധീഷിന്റെ മൊബൈൽ ഫോൺ കാണാനില്ലെന്നും ജോലിയുമായി ബന്ധപ്പെട്ട് ഉയർന്ന പൊലീസ് ഉദ്യോഗസ്ഥരിൽ നിന്ന് സുധീഷിന് സമ്മർദ്ദമുണ്ടായിരുന്നുവെന്നും കുടുംബം പറയുന്നു.

### Related Links & Sources
- [Original Story Source](https://kuttiadi.truevisionnews.com/news/156513/body-policeman-who-found-dead-kuttiadi-cremated-his-house)