---
title: "#kakkattaccident | രാജേഷിന് വിട നൽകാനൊരുങ്ങി നാട്;  സംസ്കാരം വൈകീട്ട് മൂന്നരയോടെ "
english_title: "#The #country #about #say #goodbye #Rajesh #Funeral #four #pm"
publisher: "kuttiadinews.in"
canonical_url: "https://kuttiadi.truevisionnews.com/news/244162/the-country-about-say-goodbye-rajesh-funeral-four-pm"
published_at: "2024-10-21T15:16:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6716239961e62_accodent.jpg"
keywords: []
---

# #kakkattaccident | രാജേഷിന് വിട നൽകാനൊരുങ്ങി നാട്;  സംസ്കാരം വൈകീട്ട് മൂന്നരയോടെ 

> **Lead Summary:** **കക്കട്ട് : **കോഴിക്കോട് കക്കട്ടിൽ ടൂറിസ്റ്റ് ബസ്സിനടിയിൽ പെട്ട് മരിച്ച സ്കൂട്ടർ യാത്രികനായ രാജേഷിന് വിടനൽകാനൊരുങ്ങി നാട്.

## Article Content

**കക്കട്ട് : **കോഴിക്കോട് കക്കട്ടിൽ ടൂറിസ്റ്റ് ബസ്സിനടിയിൽ പെട്ട് മരിച്ച സ്കൂട്ടർ യാത്രികനായ രാജേഷിന് വിടനൽകാനൊരുങ്ങി നാട്.

കോഴിക്കോട് മെഡിക്കൽ കോളേജിൽ പോസ്റ്റ് മോർട്ടം നടത്തിയ മൃതദേഹം അല്പസമയത്തിനുള്ളിൽ വീട്ടിൽ എത്തിക്കും. വീട്ടുവളപ്പിലെ പൊതുദർശനത്തിനു ശേഷം വൈകീട്ട് മൂന്നരയോടെ വീട്ടുവളപ്പിൽ സംസ്കരിക്കും.

കുറ്റ്യാടി -നാദാപുരം സംസ്ഥാന പാതയിൽ ഇന്നലെ വൈകിട്ട് അഞ്ച് മണിയോടെയായിരുന്നു അപകടം. നാദാപുരം ഭാഗത്ത് നിന്ന് വരുകയായിരുന്ന ടൂറിസ്റ്റ് ബസ് അതേ ദിശയിൽ പോവുകയായിരുന്ന സ്കൂട്ടറിൽ ഇടിക്കുകയായിരുന്നു.

നരിപ്പറ്റ നീർവേലി ക്ഷേത്രത്തിനടുത്തെ ഇല്ലത്ത് മീത്തൽ രാജേഷ്( 46 ) ആണ് അപകടത്തിൽ മരിച്ചത്.

അമിത വേഗത്തിൽ പാഞ്ഞെത്തിയ ടൂറിസ്റ്റ് ബസ്സിന്റെ കാറ്റിൽ രാജേഷ് ഓടിച്ച സ്കൂട്ടറിന്റെ നിയന്ത്രണം വിട്ടുപോവുകയായിരുന്നുവെന്ന് ദൃക്സാക്ഷികൾ പറഞ്ഞു.

നിയന്ത്രണം വിട്ട സ്കൂട്ടറിലേക്ക് ബസ് ഇടിക്കുകയും , ഇടിയുടെ ആഘാതത്തിൽ സ്കൂട്ടറിൽ നിന്ന് തെറിച്ച് രാജേഷ് ബസ്സിൻ്റെ ചക്രത്തിനടിയിൽപ്പെട്ട് തൽക്ഷണം മരിക്കുകയായിരുന്നു.

അപകടത്തിൻ്റെ സിസിടിവി ദൃശ്യങ്ങൾ പുറത്ത് വന്നിരുന്നു. സംഭവത്തിൽ ബസ് ഡ്രൈവറായ മലപ്പുറം തച്ചുംപൊയിൽ സ്വദേശി അർഷദിനെ പൊലീസ് അറസ്റ്റ് ചെയ്തിട്ടുണ്ട്.

### Related Links & Sources
- [Original Story Source](https://kuttiadi.truevisionnews.com/news/244162/the-country-about-say-goodbye-rajesh-funeral-four-pm)